Studieondersteuning

VOORWOORD

AfriForum maak daarvoor voorsiening om werknemers finansieel te help om toegang tot opleiding- en ontwikkelingsgeleenthede te kry. Die organisasie moedig personeel dus aan om van die geleenthede gebruik te maak om hul vaardighede en kwalifikasies deur deeltydse studies te verbeter.

Die koste van opleiding word as ’n belegging in die langtermynontwikkeling van ons personeel beskou wat tot voordeel van die werknemer sowel as die werkgewer strek.

Werknemers moet seker maak dat die kwalifikasies toepaslik is op die funksie wat hulle uitvoer en dat die organisasie eers goedkeuring gee voordat registrasie plaasvind.

Personeel wat goedkeuring van die organisasie ontvang om hul studies finansieël te ondersteun, moet aan die volgende bepalings en voorwaardes voldoen:

1. Die kursus moet binne die voorgeskrewe tydperk begin en afgehandel word.
2. Daar moet aan die begin van elke jaar of semester ’n voldoende bewys van inskrywing aan die organisasie verskaf word.
3. Die organisasie met van toets-/eksamenuitslae voorsien word sodra dié uitslae beskikbaar is.
4. Die organisasie behou die reg voor om te enige tyd verdere betalings aan ’n instelling op te skort indien die organisasie van mening is dat die betrokke werknemer nie bevredigende vordering met sy/haar kursus toon nie.
5. Studieperiodes word gedurende normale werksure toegelaat en word deur die organisasie se studieverlofbeleid onderskryf.
6. Die voordeel van studiehulp is beskikbaar vir alle permanente personeel wat ‘n minimum periode van een jaar by die organisasie in diens is.
7. Goedkeuring van die kostes van dié tipe studies sal gebaseer word op die werknemer se tydperk van diens, prestasie, begrotingsbeperkings, bestuursdiskresie en of dit binne die omvang van die werk van die werknemer val.
8. Die organisasie sal vereis dat die werknemer wat met finansiële hulp bygestaan word ’n tydperk terugwerk wat deur bestuur bepaal sal word.
9. Die verskuldigde bedrag sal direk voor of op die registrasiedatum direk aan die instelling betaal word.
10. Sou die werknemer sy/haar dienste vir enige rede behalwe aflegging by die organisasie tydens die studieperiode beëindig, sal die totale bedrag wat die organisasie vir die werknemer se studies betaal het onmiddellik by diensbeëindiging aan die werkgewer betaalbaar wees.
11. Indien die werknemer ’n vak of kursus verbeur, nie ’n vak skryf nie of nie die kursus voltooi nie sal die volle koste van die vak(ke) of kursus(se) oor ’n maksimum tydperk van twaalf maande deur die werknemer aan die organisasie terugbetaal word.